Børn og ung undir 18 ár
Aldursmørk
Børn, sum ikki eru fylt 15 ár, kunnu ikki verða sett í arbeiði. Tó kunnu børn, sum eru fylt 13 ár, hava lættari arbeiði innan fyri avmarkað sløg av arbeiði og eftir nærri ásettum treytum.
Børn undir 13 ár kunnu tó fáa samsýning fyri at upptraðka í framførslum o.tíl. av mentanarligum ella listarligum slagi, ítróttatiltøkum ella í sambandi við upptøku av filmi o.tíl. Fyri ung, sum eru undir 13 ár, skal loyvi vera fingið í hvørjum einstøkum føri frá foreldrum ella verja.
Serligar skyldur hjá arbeiðsgevaranum
Tá ið ung undir 18 ár verða sett í arbeiði, skulu tað í sambandi við skipanina og útinnanina av arbeiðinum verða tikin atlit til aldurin, menningina og heilsustøðuna hjá tí unga, og at tann ungi hevur møguleika til at røkja sína skúlagongd.
Tá ið ung undir 18 ár verða sett í starv, skal arbeiðsgevarin, áðrenn arbeiðið verður útint, geva upplæring í arbeiðinum og geva gjølliga kunning um møguligar vandastøður, og hvussu tær kunnu verða fyribyrgdar. Arbeiðsgevarin skal skrivliga vátta, at henda upplæringin og kunningin er farin fram, og hvat hon í høvuðsheitum fevndi um. Tann ungi skal eisini vátta, at upplæringin og kunningin eru móttiknar. Arbeiðsgevarin skal goyma hesi skjølini og vísa tey fram, um Arbeiðs- og brunaeftirlitið krevur tað.
Ung undir 18 ár mugu ikki verða sett til at handfara amboð ella tól, evni, tilfar o.tíl., sum kunnu vera vandamikil fyri tann unga, um tey ikki verða handfarin rætt, uttan so, at ein persónur yvir 18 ár er til staðar í hølunum ella nærhendis tí unga, so at persónurin kann hava eftirlit við og vegleiða tann unga. Tað er tá ein treyt, at hesin persónurin, ið er yvir 18 ár, hevur neyðugar førleikar til at handfara tólið ella amboðið, evnið ella tilfarið, so at viðkomandi dugir at meta um, hvørt handfaringin hjá tí unga kann elva til skaða ella ikki.
Er tann ungi í læru við góðkendum lærusáttmála, kann hann handfara tey vandamiklu amboðini, tá tað verður gjørt sum liður í læruni.
Tá ið ung undir 15 ár verða sett í arbeiði, skal arbeiðsgevarin kunna foreldur ella verja teirra um arbeiðið og um vanlukku- og sjúkuvandar, sum møguliga eru knýttir at arbeiðinum. Arbeiðsgevarin skal somuleiðis kunna um tey tiltøkini, sum eru gjørd viðvíkjandi trygd og heilsu.
Arbeiðstíð
Arbeiðstíðin hjá ungum undir 17 ár skal ikki fara upp um 10 tímar um dagin. Í einstøkum førum kann arbeiðstíðin tó økjast fyri lærlingar við góðkendum lærusáttmála upp í 12 tímar, tá ið arbeiðsumstøðurnar krevja tað.
Arbeiðstíðin skal verða skipað soleiðis, at hon er hóskandi fyri tey ungu við atliti at aldri, førleika og menning hjá tí unga og við atliti at tí fakbólkinum, sum tey virka innanfyri, soleiðis at arbeiðið kann verða útint heilsuliga og trygdarliga forsvarligt.
Ung undir 17 ár skulu sum meginregla ikki arbeiða um náttina í tíðarbilinum millum kl. 24.00 og kl. 06.00. Tó kunnu ung undir 17 ár arbeiða um náttina í styttri tíðarskeiðum.
Um dagliga arbeiðstíðin fer upp um 4½ tíma, skulu ung undir 17 ár hava ein steðg upp á í minsta lagi 30 minuttir. Steðgurin skal vera lagdur eitt hóskiligt tíðspunkt og um møguligt, skal steðgurin vera samanhangandi.
Ymisk undantøk eru tó galdandi fyri lærlingar.
Reglur um hvíldartíð, steðg og frísamdøgur
Ung undir 17 ár skulu hava eina samanhangandi hvíldartíð upp á í minsta lagi 12 tímar í samdøgrinum. Ung undir 15 ár skulu tó hava eina samanhangandi hvíldartíð upp á 14 tímar í samdøgrinum. Innan fyri hvørt skeið upp á 7 samdøgur skulu ung undir 17 ár hava tvey samanhangandi frísamdøgur.
Frísamdøgur skulu verða skipað soleiðis, at tey eru hóskandi fyri tey ungu við atliti at aldrinum og tí arbeiðinum, sum tey útinna. Frísamdøgrini skulu altíð vera skipað soleiðis, at tey eru heilsu- og trygdarliga forsvarlig.