Lyftiútgerð og spøl

Lyftiútgerð og spøl skulu við atliti til konstruktión, tilgerð, útgerð, trygdarútgerð og støðufesti verða soleiðis innrættað, at tey í teimum tilætlaðu rakstrarumstøðum kunna setast upp, nýtast, viðlíkahaldast og umvælast trygdar- og heilsuliga fult forsvarligt.

 

Merking

Øll lyftiútgerð og spøl skulu, tá tey verða latin til nýtslu ella framsýning her í landinum, verða haldgott og týðiliga merkt við í minsta lagi hesum upplýsingum:

  • Navn og bústaður hjá framleiðaranum,
  • framleiðsluár,
  • raðnummar og sniðmerki,
  • størst loyvda arbeiðslast (SWL) og
  • møguligar lastbólkar.

Beriútgerð, sum er partur av eini lyftiútgerð ella spæli, skal merkjast. Har hetta ikki er møguligt, skal útvegarin lata skjal ella talvur við, sum innihalda neyðuga váttan og upplýsingar.

Tá lyftiútgerð og spøl verða útflýggjað, skal brúkaraleiðbeining fylgja við, sum er neyðug fyri at hesi kunna nýtast, flytast og setast upp uttan ampa fyri trygd og heilsu, og kunna haldast í forsvarligum standi.

 

Uppseting og lastroynd

Uppseting og niðurtøka av lyftiútgerð og spølum má bert gerast av væl skikkaðum persóni. Uppseting og niðurtøka skal gerast forsvarliga og sambært leiðbeining frá útvegaranum.

 

Fráboðan og eftirlitsbók

Lyftiútgerð og spøl mugu ikki takast í nýtslu sum nýggj, fyrr enn tey eru fráboðaði Arbeiðs- og brunaeftirlitinum.

Skyldu til at fráboða hevur tann, ið stendur fyri uppseting av lyftiútgerð ella spæli. Við eigaraskifti liggur hendan skylda tó hjá nýggja eigaranum. Fráboðanin skal gerast á eitt serligt fráboðanarskjal, ið fæst frá Arbeiðs- og brunaeftirlitinum. Fráboðanin skal sendast til Arbeiðs- og brunaeftirlitið.

 

Nýtsla

Eigarar og brúkarar av lyftiútgerð og spølum skulu tryggja sær, at hesi verða brúkt á ein forsvarligan hátt við atliti til trygd og heilsu, í samsvar við brúkaraleiðbeiningina frá útvegaranum og við umhugsni til fyriliggjandi umstøður.

Lyftiútgerð og spøl mugu bert nýtast til persónlyfting, um so er, at hesi eru innrættað til hetta endamál.

Lyftiútgerð og spøl, har kranføraraprógv verður kravt, mugu bert verða passaði av persóni við slíkum prógvi, sambært kunngerð nr. 91 frá 20. juni 2011 um loyvisbræv til kranar, gaffiltrukkar og onnur lyfti- og flutningstól.

 

Viðlíkahald og kanning

Lyftiútgerð og spøl skulu haldast í einum slíkum standi, at tey við atliti til trygd og heilsu eru fult forsvarlig og skulu kannast og viðlíkahaldast eftir leiðbeiningi frá útvegaranum. Í minsta lagi hvønn 12. mánað skal av útvegaranum ella øðrum sakkønum verða gjørd ein høvuðskanning.

Lyftiútgerð, sum verður brúkt uttandura, skal, tá hendan er 10 ára gomul, roknað frá framleiðsluárinum, gjøgnum ein høvuðskanning av serligum sakkønum, smb. § 24 (10 ára kanning). Hendan kanning kemur ístaðin fyri 12 mánaðars kanningina sama ár.

 

Yvirlit yvir løggild virkir: