Eldhættisligt virksemi

Til at seta á stovn virksemi, har ið spreingikvæmir, eldfimir ella eldførir løgir, luftevni ella onnur vandaevni verða goymd, framleidd, viðgjørd, handfarin ella nýtt, krevst loyvi frá Arbeiðs- og brunaeftirlitinum. Sama er, tá ið tað snýr seg um umbyggingar, umvælingar, økingar, niðurtøku ella broytingar í rakstrinum.

Arbeiðs- og brunaeftirlitið kann krevja, at neyðug tiltøk verða sett í verk til tess at byrgja fyri eldvanda, eldspjaðing ella spreinging, ella til tryggingar av fullgóðum rýmingar-, bjargingar- og sløkkingarmøguleikum, um eldur kemur í, ella um óhapp stendst av vandamiklum evnum.

Bygging av bygningum og pørtum av bygningum, sum eru fevndir av byggilógini, men har afturatbygningurin verður nýttur til eldhættisligt virksemi, krevur loyvi frá Arbeiðs- og brunaeftirlitinum.

Borgarin, byggiharrin og ráðgevin skulu lata øll vanlig byggimál inn til avvarðandi kommunu at viðgera.

Kommunali byggimyndugleikin viðger øll byggimál sambært byggilógini, meðan Arbeiðs- og brunaeftirlitið bert kemur inn í viðgerðina av byggimálum, tá talan er um at seta serkrøv í sambandi við umsóknir um at stovna ella broyta eldhættisligt virksemi.