Føst arbeiðspláss

Reglurnar um innrætting av føstum arbeiðsplássum eru ásettar í kunngerð um innrætting av føstum arbeiðspássum

í stuttum eru yvirskipað reglurnar um innrætting av føstum arbeiðsplássum soleiðis:

Nýinnrætting ella stór umbygging

Nýinnrætting ella stór umbygging av arbeiðsplássum skal raðfestast og fremjast við atliti at trygd og heilsu, soleiðis at:

  • arbeiðsgongdin verður fulltrygg, herímillum, at fullgóð viðurskifti eru viðvíkjandi flutningi og goymslu við tøkniligum hjálpartólum í so stóran mun, sum til ber,
  • møguligir vandar og ampar frá arbeiðsgongdum, m.a. dust ella onnur luftdálking, geisling, ovurstór hita /kuldastig,  larmur,  ringur deymur v.m., kunnu avmarkast í størst møguligan mun og tað slepst undan óneyðugari ávirkan,
  • bygningar, lendi, ravmagnsútbúnaður v.m. kunnu brúkast, vaskast, viðlíkahaldast og eftirkannast á ein fulltryggan hátt av teimum, sum gera arbeiðið, og øðrum á staðum,
  • brúkt verður bygningskonstruktión og tilfar, sum gevur eina fullgóða bjálving móti fukti, hita og kulda, umframt at ljóð-, innilufts- og ljósviðurskifti eru nóg góð,
  • ikki verður brúkt byggitilfar, sum gevur frá sær damp ella dust við heilsuskaðiligari ella nervandi styrki, ella sum kann føra til nervandi ella vandamiklar mongdir av støðuravmagni (statist elektrisitet),
  • har, sum arbeiðið kann hava nógv dustrok ella heilsuskaðiliga dálking við sær, skulu ikki brúkast bygningskonstruktiónir ella tilfar, ið savnar dálkingina, ella sum er torført at vaska.

Ætlanir um nýbygging ella umfatandi innrætting ella broyting av bygningum, hølum og tøkniligum anleggum og útbúnaði v.m. skulu ummælast av Arbeiðseftirlitinum, áðrenn innrætting ella broyting verður gjørd. Tað sama er galdandi, tá ið bygningar, hølir, øki v.m. skulu útleigast til vinnuligt endamál. 

 

Arbeiðsstað

Arbeiðsstaðið hjá tí einstaka skal vera rúmligt og hóskandi innrættað, soleiðis at neyðugur útbúnaður, hjálpartól og tilfar kunnu standa væl fyri sínámillum og soleiðis at allar funktiónir, sum hava samband við arbeiðið, kunnu útinnast við fulltryggum arbeiðsrørslum og -støðum.

Har sum arbeiðið uttan trupulleika kann gerast sitandi, skal hóskandi pláss vera til tað. Har sum arbeitt verður standandi ella gangandi, skulu, um møguligt, vera setur til at sita á, tá ið steðgur er í arbeiðinum.

Kravd verður fulltrygg atgongd til og rýmingarmøguleiki frá arbeiðsstaðnum. 

Arbeiðsstaðið skal vera støðað og innrættað soleiðis, at starvsfólk ikki óneyðugt verða ávirkað av evnum og tilfari, geisling, ovurstórum hita-/kuldastigum, ringum deymi, larmi ella ristingum v.m. frá arbeiðsgongdum ella -staði hjá øðrum.

Har sum vandi er fyri dálking av tilfari við smittuvanda, ella av tilfari, sum við atliti at trygd og heilsu er týdningamikið at fáa burtur av húðini ella forða spjaðing av, skulu - nærindis arbeiðsstaðnum - vera hóskandi og nóg nógv hjálpartól, so sum eygnaskolifløska, neyðbrúsa og serlig reinsievnir.

 

Útbúnaður

Á arbeiðsstaðnum skal hóskandi útbúnaður vera, soleiðis at arbeiðið kann útinnast á ein fulltryggan hátt.

Stólar, arbeiðsborð og líknandi, sum verða brúkt til skiftandi arbeiðsuppgávur og av skiftandi starvsfólkum, skulu um neyðugt kunnu stillast.

Útbúnaður skal verða gjørdur av tilfari, sum ikki hevur heilsuvanda við sær. Tilevning og tilfar skulu vera av slíkum slag, ið kann reingerast á fulldyggan hátt hvat viðvíkur teirri dálking, tey verða útsett fyri. 

 

Hitalag v.m.

Í arbeiðstíðini skal hitin í arbeiðsrúminum lagast eftir arbeiðinum við atliti at arbeiðshættum og tí likamliga virkseminum, sum starvsfólkið arbeiðir undir. Hitalagið í arbeiðsrúminum skal vera uttan nervandi hitamunir.

 

Luftnýggjan

Hvørt arbeiðsrúm skal hava nóg nógva tilførslu av frískari luft uttan nervandi gjóstur.

Mekanisk luftnýggjan, sum gevur nóg nógva fríska luft við hóskandi hita og vætu, skal setast upp, um natúrlig luftnýggjan gjøgnum vindeygu, hurðar og annað ikki er nøktandi.

Har sum luftevnir, dust ella tílíkt, ið eru vandamikil fyri heilsuna, ella sum skapa vanda fyri eksplosjón, roykur, smáverur, aerosoler, ringur roykur ella onnur nervandi luftdálking kann taka seg upp, skal mekanisk útsúgving setast upp, sum, í tann mun til ber, flytur burtur dálkingina frá staðnum, har hendan tekur seg upp. Samstundis skal frísk luft við hóskandi hita tilførast.

Har dálkingin ikki á munagóðan hátt kann førast burtur á staðnum, har hon tekur seg upp, skal arbeiðsgongdin flytast til eitt serstakt rúm, kabinu ella tílíkt við hóskandi mekaniskari ventilatión, har einki annað arbeiðið verður gjørt. 

  

Vælferðafyriskipanir

Á arbeiðsplássinum skulu niðanfyri nevndu hentleikar vera til taks fyri alt starvsfólkið:

  • toilett,
  • matstova, tá ið matarsteðgir eru í arbeiðstíðini,
  • vask,
  • klædnaskáp ella klædnarúm, um klæði skulu skiftast, og
  • telefonautomat, um starvsfólkið ikki á annan hátt hevur atgongd til at brúka telefon.
     

 Meira útgreinaði krøv finnast undir reglum og vegleiðingum