Sálarlig fyrstahjálp á arbeiðsplássinum

Á arbeiðsplássum, har ið vandi er fyri skelkandi tilburðum, eigur arbeiðsgevarin at síggja til, at sálarlig fyrstahjálp verður givin. Arbeiðsgevarin kann tilevna persónar, ið kunnu geva sálarliga fyrstuhjálp, og eigur, um neyðugt, at tilkalla serkøna hjálp uttanhýsis.

 

Hvat er ein skelkandi tilburður?

Ein skelkandi tilburður er at hava upplivað ella at hava verið vitni til likamligan ella sálarligan harðskap, hóttan, álvarsligt óhapp ella deyða. Skelkandi tilburðir kunnu koma fyri í øllum vinnugreinum.

 

Hví geva sálarliga fyrstuhjálp?

Fólk, ið uppliva ein skelkandi tilburð, kunnu fáa ymiskar sálarligar, likamligar, kensluligar og atferðarligar reaktiónir, sum kunnu órógva teirra førleika at klára seg beint eftir tilburðin. At reagera soleiðis er púra normalt.

Endamálið við sálarligari fyrstuhjálp er at hjálpa tí skelkaða at koma fyri seg aftur. Sálarlig fyrstahjálp er fyrsta stigið í at handfara keðiligu upplivingina og kann hjálpa starvsfelaganum at varðveita sín fakleika og sjálvvirði.  

 

Hvat er sálarlig fyrstahjálp?

Sálarlig fyrstahjálp er ikki terapi ella viðgerð, men snýr seg um at koma einum øðrum til hjálpar, vísa umsorgan og ugga beint eftir hendingina.

Sálarlig fyrstahjálp kann verða givin av starvsfelagum, ið eru tilnevndir sálarligir fyrstuhjálparar á arbeiðsplássinum. Hesir persónar eiga at hava neyðugar førleikar og upplæring. Sálarlig fyrstahjálp er einføld og inniber at :

  • Skapa róð og tryggleika rundan um tann skelkaða, t.d. við at fara í eitt annað høli
  • Taka stýringina, varðveita yvirlitið og tosa týðiligt
  • Vera nærverandi
  • Lurta væl og ikki avbróta 
  • Bjóða praktiska hjálp

 

Umráðandi er at fyrstahjáparin IKKI:

  • Spyr inn til smálutir
  • Tulkar kenslur ella upplivingar
  • Tosar um egnar royndir
  • Roynir at læra, køva ella bagatellisera
  • Gevur órealistisk lyftir

 

Viðmælt verður, at arbeiðsplássið tryggjar, at skelkaði starvsfelagin kemur trygt til hús.