Brunatrygd

Brunatrygd hevur stóran samfelagsligan týdning. Er brunatrygdin ikki í lagi, kann tað kosta mannalív, eins og onnur stór virði kunnu fara fyri skeytið. Arbeiðs- og brunaeftirlitið hevur sum endamál at fyribyrgja eldsbruna og avmarka fylgjurnar av møguligum eldsbruna. 

Arbeiðs- og brunaeftirlitið virkar út frá kapitli 8 um fyribyrging o.a. í tilbúgvingarlógini. 

Arbeiðs- og brunaeftirlitið umsitur viðurskifti, ið snúgva seg um:

  • Viðgerð av byggimálum, har eldhættisligt virksemi er ella verður sett á stovn
  • Brunasýn av øllum alment atkomuligum bygningum (ikki privatum sethúsum og íbúðum)
  • Brunasýn av eldhættisligum virksemi
  • Tilbúgvingarætlanir við størri uttandura tiltøkum, sum t.d. festivalum

Gevið gætur, at øll byggimál skulu fyrst til viðgerðar hjá kommunala myndugleikanum. Kommunali byggimyndugleikin sendir málið víðari til Arbeiðs- og brunaeftirlitið at viðgera. 

Les lógir og kunngerðir um brunatrygd her.

Les vegleiðingar um brunatrygd her.

Byggimál og stovnseting av virksemi

Við byggimálum, har eldhættisligt virksemi er ella verður sett á stovn, skal Arbeiðs- og brunaeftirlitið gerast partur av viðgerðini av byggimálinum. Mannagongdin er tann, at byggimálið skal fyrst sendast til viðgerðar hjá viðkomandi kommunala byggimyndugleika, sum viðgerð byggimálið sambært byggilógini. Hareftir sendir kommunan byggimálið víðari til Arbeiðs- og brunaeftirlitið at viðgerða.

Arbeiðs- og brunaeftirlitið setur serkrøv til byggimál, har eldhættisligt virksemi er ella verður sett á stovn. Tá ið talan er um vanlig byggimál, ið ikki innibera eldhættisligt virksemi, er tað bert tann kommunali byggimyndugleikin, ið viðgerð málið. 

 Loyvi frá Arbeiðs- og brunaeftirlitinum krevst til virksemi har, ið:

  • Eeldfimir løgir
  • Eldførir løgir
  • Luftevni
  • Onnur vandaevni

verða:

  • Goymd
  • Framleidd
  • Viðgjørd
  • Handfarin
  • Nýtt

ella um núverandi virksemi skal:

  • Umbyggjast
  • Umvælast
  • Økjast
  • Takast niður
  • Broytast

Bygging av bygningum og pørtum av bygningum, sum eru fevndir av byggilógini, men har afturatbygningurin verður nýttur til eitt eldhættisligt virksemi, krevur eisini loyvi frá Arbeiðs- og brunaeftirlitinum.

Arbeiðs- og brunaeftirlitið kann krevja, at neyðug tiltøk verða sett í verk til tess at byrgja fyri eldvanda, eldspjaðing ella spreinging, ella til tryggingar av fullgóðum rýmingar-, bjargingar- og sløkkingarmøguleikum, um eldur kemur í, ella um óhapp stendst av vandamiklum evnum.

Brunasýn av bygningum í nýtslu

Arbeiðs- og brunaeftirlitið fremur brunasýn av øllum alment atkomuligum bygningum í nýtslu og bygningum, ið hýsa eldhættisligum virksemi. Hetta verður kallað rakstrarsýn. Til eitt rakstrarsýn verður hugt eftir, um brunatrygdin er í lagi.

Í øllum bygningum, har fólk koma saman, hyggur Arbeiðs- og brunaeftirlitið m.a. eftir fylgjandi viðurskiftum:

  • Um bjargingarøkið til m.a. brandbilar er frítt og ruddiligt
  • Um ásetta vatnveitingin er í lagi
  • Um rýmingarbreiddir svara til loyvda fólkatalið í hølinum
  • Um minst 2 rýmingarleiðir eru, og at tær eru hvør fyri seg
  • Um hurðarnar í rýmingarleiðunum lata upp úteftir
  • Um rýmingarleiðirnar eru fríar, ruddiligar og nøktandi upplýstar bæði inni og úti
  • Um hurðar kunnu læsast upp innanífrá uttan lykil ella amboð
  • Um rýmingarhurðar, sum ikki verða nýttar dagliga, eru merktar ”NEYÐÚTGONGD”
  • Um neyðútgongdir ella skelti eru fjald av garðinum ella øðrum
  • Um bjargingarop eru í uppihaldsrúmum
  • Um slanguskáp javnan verða kannað og roynd
  • Um uppheingingarstøð til CO2- og pulvursløkkjarar eru merkt eftir ásetingunum
  • Um CO2- og pulvursløkkjarar eru kannaðir eina ferð um árið og útskiftir 5. hvørt ár
  • Um tøknirúm eru ruddulig/frí fyri óruddi
  • Um byggiligar broytingar, ið gjørdar eru nýliga, eru sýnaðar av Arbeiðs- og brunaeftirlitinum
  • Um brunavandamiklar goymslur eru, og um tær eru lógliga innrættaðar
  • Um starvsfólk eru kunnað um reglur, staðseting og nýtslu av sløkkiútgerð
  • Um brunaætlan er, ið sýnir rýmingarleiðir, bjargingarop og staðseting av sløkkiútgerð

Afturat teimum vanligu brunakrøvunum, ið eru nevnd omanfyri, eru serlig krøv galdandi fyri:

  • Gistingarhús (bygningar og gistingardeildir, ið rúma fleiri enn 10 sovi- ella seingjarplássum, og stovnar, har rørslutarnað kunnu koma)
  • Samkomuhús (bygningar og høli, har nógv fólk koma saman)

Um sýnið vísir, at viðurskifti eru, sum kunnu elva til serligan vanda fyri bruna, kann Arbeiðs- og brunaeftirlitið forbjóða virkseminum ella geva forboð fyri, at bygningar ella partar av bygningum, hølum ella mannaverki verða nýtt, til brekið er rættað.  

Tá ið talan er um eitt lítið brek, ið hevur minni upp á seg, verða skrivlig boð givin um at rætta brekið innan eitt ávíst tíðarskeið.

Tilbúgving

Arbeiðs- og brunaeftirlitið viðger tilbúgvingarætlanir viðvíkjandi eldhættisligum virksemi og stórum uttandura tiltøkum, har ið nógv fólk savnast. Tað er tó altíð tann viðkomandi kommunali myndugleikin, ið viðger málið fyrst.

Til uttandura tiltøk, har ið nógv fólk møtast, kann Arbeiðs- og brunaeftirlitið gera av, at ætlanir skulu verða settar í verk, sum fyribyrgja eldvanda, eldspjaðing ella spreinging ella tryggja, at fullgóðir rýmingar-, bjargingar- og sløkkingarmøguleikum eru, um eldur skuldi komið í, ella um óhapp skuldi staðið av vandamiklum evnum.

Arbeiðs- og brunaeftirlitið kann eisini gera av, at tá tiltøk eru, skal vaktarhald vera, ið kommunan stendur fyri, og sum fyriskiparin skal gjalda fyri eftir taksti, ið kommunan ásetir. Tann, ið hevur vaktarhald, skal hava hóskandi samleikaprógv og kann vera til staðar uttan nakran rættarligan úrskurð.

Vegleiðingar um brunatrygd

Les vegleiðingar um brunatrygd her

Lóg og kunngerð um brunatrygd

Les lógir og kunngerðir um brunatrygd her.