Arbeiðs- og brunaeftirlitið

Arbeiðs- og brunaeftirlitið er eftirlits- og vitunarstovnur undir Umhvørvis- og vinnumálaráðnum. Stovnurin er føroyskur myndugleikin innan:

  • Arbeiðsumhvørvi 
  • Brunatrygd og ymsikt viðurskifti innan tilbúgving
  • Mát og vekt (metrologi)
  • Spreingievni og spreingiarbeiði
  • Fýrverk
  • Roykfríum umhvørvi

Høvuðsuppgávurnar hjá Arbeiðs- og brunaeftirlitinum eru støðugt at betra trygdin og vitinarstøðið á økjumum sum stovnurin umsitur. Hesum málum røkkur stovnurin við at fremja eftirlitsvitjanir, leiðbeina áhugapørtum og granska óynsktar hendingar - t.d. álvarslig arbeiðsóhapp. 

Arbeiðs- og brunaeftirlitið ráðgevur landsstýrismanninum innan ábyrgdarøkið hjá stovninum.

Søga

Arbeiðseftirlitið
Arbeiðseftirlitið í Føroyum hevur sín uppruna í gamla ‘Fabrikstilsynet’ og ‘Dampkedeltilsynet’ frá 1870-árunum.  

Arbeiðsmarknaðarmál vóru millum fyrstu føroysku málsøkini, sum vóru yvirtikin, aftaná at heimastýrislógin kom í gildi í 1948.

Arbeiðseftirlitið varð sett á stovn við løgtingslóg nr. 58 frá 24. mai 1974 um arbeiðaravernd og fór at virka frá 1975. Arbeiðseftirlitið avloysti tá gamla ‘Maskineftirlitið‘ og var fyrstu árini partur av teknisku fyrisitingini hjá Landsstýrinum.

Myndugleikin gjørdist sjálvstøðugur almennur stovnur í fyrru helvt av 1980’unum við Eli Davidsen sum stjóra.  

Í seinnu helvt av 1980-árunum vaks játtanin hjá Arbeiðseftirlitinum, og stovnurin varð deildur sundur í deildir kring landið. Stórar sparingar vórðu tó framdar fyrst í 1990-árunum, sum høvdu við sær, at deildirnar kring landið stongdu, og at stovnurin varð savnaður í Tórshavn.  

Í 2000 avloysti nýggja arbeiðsumhvørvislógin gomlu arbeiðaraverndarlógina frá 1974. Nýggja lógin breiðkaði virkisøkið hjá stovninum munandi.

Brunaeftirlitið
Brunaeftirlitið (fyrr Brunaumsjón landsins) varð sett á stovn í 1986 við heimild í løgtingslóg nr. 78 frá 12. juni 1986 um eldsbruna o.a. Fyrstu nógvu árini var myndugleikin skipaður sum ein deild hjá Landsverkfrøðingastovninum, men varð seinni egin stovnur við Petur á Lava Olsen sum stjóra.

Arbeiðs- og brunaeftirlitið
Í 2017 vórðu Arbeiðseftirlitið og Brunaeftirlitið løgd saman í ein stovn við heitinum Arbeiðs- og brunaeftirlitið. 

Gjaldsupplýsingar v.m.

Virkistal:              422061
Stovnsnummar:  125920
EAN-nummar:     5797100000331
Kontonummar:    6460-5673986   

 

Faktura bústaður hjá Arbeiðs- og brunaeftirlitinum: 

Arbeiðs- og brunaeftirlitið 
Co/ Føroya Gjaldstova 
Traðargøta 39 
160 Argir

Fráboðan til stovnin

Boða Arbeiðs- og brunaeftirlitinum frá
Øll kunnu boða Arbeiðs- og brunaeftirlitinum frá, um ein illgruni er um, at ein fyritøka brýtur arbeiðsumhvørvisreglurnar.

Tað er tó altíð eitt gott hugskot at umrøða arbeiðsumhvørvistrupulleikar í trygdarskipini/trygdarbólkinum á arbeiðsplássinum.

Hvussu kann eg boða frá? 
Tú kanst boða Arbeiðs- og brunaeftirlitinum frá við telefon ella telduposti til arb@arb.fo.

Tú hevur rætt til at vera dulnevndur, og tú fert altíð at verða viðgjørdur dulnevnt í sambandi við eftirlitsvitjanir og málsviðgerðir. Hetta er eisini galdandi, um tín arbeiðsgevari spyr Arbeiðs- og brunaeftirlitið, um nakað starvsfólk hevur vent sær til Arbeiðs- og brunaeftirlitið.

Allir privatpersónar t.d. starvsfólk í einari fyritøku hava rætt til innlit í skjølini hjá Arbeiðs- og brunaeftirlitinum m.a. fyri at síggja, hvørjar avgerðir eru tiknar og fyri at fáa kunning um, hvørji boð ein fyritøka hevur fingið álagt at fylgja. Neyðugt er tó at biðja um innlit í hesi skjøl. 

Hvat spyr Arbeiðs- og brunaeftirlitið um?
Tá ið tú setur teg í samband við Arbeiðs- og brunaeftirlitið, spyrja vit teg vanliga um hesar upplýsingarnar:

  • Navnið á fyritøkuni, bústaðin og deildina (soleiðis at vit kunnu finna arbeiðsplássið og trupulleikan, um vit gera eina eftirlitsvitjan).
  • Hvørjir trupulleikar eru við arbeiðsumhvørvinum?
  • Hvussu nógvir persónar eru fevndir av trupulleikanum?
  • Nær trupulleikin er íkomin, og hvussu leingi verður væntað, at tað verður ein trupulleiki?
  • Hevur fyritøkan eina trygdarskipan ella ein trygdarbólk, og hava tey verið uppi í málinum?
  • Navn og kontaktupplýsingar hjá tær (tað verður handfarið í trúnaði), um okkum tørvar fleiri upplýsingar um málið.
  • Hvat hendir aftaná eina fráboðan?
  • Um tú hevur sett teg í samband við Arbeiðs- og brunaeftirlitið við einum telduposti viðvíkjandi einum arbeiðsumhvørvistrupulleika, fært tú eini boð um, at vit hava móttikið tín teldupost.

Legg til merkis, at ein fráboðan um vánaligt arbeiðsumhvørvi nýtist ikki at merkja, at ein eftirlitsvitjan verður gjørd alt fyri eitt. Hvør einstøk fráboðan verður viðgjørd fyri seg og mett verður um, hvat Arbeiðs- og brunaeftirlitið skal gera í hvørjum einstøkum máli.

Meginreglan er tó, at ein vitjan altíð verður gjørd, um vit meta, at talan er um ein bráðfeingis vanda. Tú fært ikki boð um, hvørt ein eftirlitsvitjan spyrst burturúr tíni fráboðan ella ikki.