Endamálið við at gera arbeiðsplássmetingar er at avdúka:

1. Trupulleikar í arbeiðsumhvørvinum
2. Hvar møguligir trupulleikar eru

og at skjalfesta:

• Hvussu arbeiðsplássið kann loysa trupulleikarnar
• Hvør hevur ábyrgdina av, at trupulleikarnir verða loystir
• Nær uppfylging skal verða

Ein arbeiðsplássmeting (APM) gevur tykkum møguleika fyri at arbeiða systematiskt og effektivt við arbeiðsumhvørvinum á tykkara arbeiðsplássi. Ein APM er eitt amboð, ið tit kunnu nýta innanhýsis í tykkara arbeiði at fáa greiðu á arbeiðsumhvørvinum.

At gera eina APM snýr seg um at fáa eitt yvirlit yvir arbeiðsumhvørvið á arbeiðsplássinum og finna fram til tey øki, ið treingja til ábøtur. Tá ið hetta er gjørt, verður ein ætlan løgd fyri, hvussu arbeiðið at gera hesar ábøturnar skal skipast.

Arbeiðið at gera eina APM byrjar við, at øll starvsfólk fáa hvør sítt eintak av eftirmetingarlistanum, ið inniber ja/nei spurningar. Starvsfólkini eru dulnevnd og skriva tí IKKI sítt navn á.

Starvsfólkini svara spurningunum í eftirmetingarlistanum við at seta kross í við ja ella nei. Tá ið hetta er gjørt, verða eftirmetingarlistarnir savnaðir saman og gjørdir upp. Tá ið úrslitini eru klár, eiga tey at verða kunngjørd fyri øllum starvsfólkunum. Teir spurningarnir, ið fáa kross við ja, eiga at verða mettir sum antin trupulleikar ella avbjóðingar í arbeiðsumhvørvinum. Neyðugt er tá at geva hesum viðurskiftunum gætur.

Hetta verður gjørt við at gera eina arbeiðsætlan fyri, hvussu trupulleikarnir skulu loysast, og hvussu avbjóðingarnar skulu handfarast.

Aftast í hvørjum eftirmetingarlista er eitt skema, ið kann verða nýtt til at skráseta trupulleikar og avbjóðingar í arbeiðsumhvørvinum. Ein loysn eigur at verða funnin til hvønn trupulleika og hvørja avbjóðing, og viðmerkt eigur at verða, hvør tað er, ið hevur ábyrgdina av at fremja loysnina í verki. Í ávísum førum ber eisini til at seta eina freist á, nær ein loysn skal verða funnin, ella nær arbeiðið at handfara avbjóðingina skal verða byrjað. Hetta verður tá eisini skrásett.