Trygdararbeiði 

10 fólk ella fleiri 

Á øllum virkjum og arbeiðsplássum, har 10 ella fleiri fólk starvast, skulu trygdarumboð veljast og trygdararbeiði skipast eftir nærri ásettum reglum. 

Á hesum virkjum og arbeiðsplássum skulu starvsfólkini á hvørji deild ella arbeiðsøki sínámillum velja trygdarumboð. Arbeiðsleiðarin á eini deild ella arbeiðsøki, ið hevur valt eitt trygdarumboð, skal saman við hesum skipa ein trygdarbólk fyri deildina ella arbeiðsøkið. Hendan trygdarskipanin virkar sum samarbeiðslið millum leiðslu og starvsfólkahóp.

Reglurnar um álitismannaval innan viðkomandi ella tilsvarandi sáttmálaøki er vanliga galdandi fyri valbæri, valgildi og valfráboðan, tó skal fráboðast til Arbeiðs- og brunaeftirlitið hvør er valdur og hvussu trygdarskipanin er samansett.

Trygdarumboðið er tryggjað móti uppsøgn v.m. ella øðrum skerjingum í sínum arbeiðsviðurskiftum á sama hátt sum álitisfólk innan viðkomandi ella tilsvarandi fakliga øki. Eisini skal arbeiðsgevarin minst eina viku, áðrenn trygdarumboð verður sagt upp, kunna Arbeiðs- og brunaeftirlitið , soleiðis at Arbeiðs- og brunaeftirlitið hevur møguleika at kanna viðurskiftini í samband við uppsøgnina.

Valið er galdandi fyri 2 ár, ella til arbeiðsvirksemi hjá trygdarumboðnum heldur uppat. Afturval er loyvt.  


20 fólk ella fleir
i

Á øllum virkjum, har 20 ella fleiri fólk starvast, skal trygdar- og heilsuarbeiðið samskipast av eini trygdarnevnd. Á virkjum, har ein ella tveir trygdarbólkar eru settir, verður trygdarnevndin samansett av trygdarbólkinum/-bólkunum og arbeiðsgevaranum, ella einum av honum tilnevndum ábyrgdarpersóni.

Eru fleiri enn 2 trygdarbólkar, velja trygdarumboðini sínámillum 2 umboð og arbeiðsleiðararnir velja sínámillum 2 umboð, ið saman við arbeiðsgevaranum, ella einum av honum tilnevndum ábyrgdarpersóni mynda, trygdarnevndina

Limirnir í nevndini eru valdir fyri 2 ár. Afturval er loyvt. Um arbeiðsleiðari ella trygdarumboð fara frá sum limir í trygdarbólkinum, fara teir samstundis frá sum limir í trygdarnevndini. 


Minni enn 10 fólk

Har talið av arbeiðsfólki er so lítið, at eingin trygdarskipan verður sett á stovn, skal arbeiðsgevarin syrgja fyri at samstarva um trygdar- og heilsuspurningar. Hetta samstarv skal fremjast við persónligum sambandi millum arbeiðsgevaran, møguligan arbeiðsleiðara og hini, ið starvast á virkinum.