Brunasýn

Rakstrarsýn av bygningum í nýtslu

Arbeiðs- og brunaeftirlitið fremur brunasýn av øllum alment atkomuligum bygningum í nýtslu og bygningum, ið hýsa eldhættisligum virksemi. Hetta verður kallað rakstrarsýn. Til eitt rakstrarsýn verður hugt eftir, um brunatrygdin er í lagi.

 

Fyri allar bygningar, har fólk koma saman, hyggur Arbeiðs- og brunaeftirlitið m.a. eftir fylgjandi viðurskiftum:

  • um bjargingarøkið til m.a. brandbilar er frítt og ruddiligt
  • um ásetta vatnveitingin er í lagi
  • um rýmingarbreiddir svara til loyvda fólkatal í hølinum
  • um minst 2 rýmingarleiðir eru, og at tær eru hvør fyri seg
  • um hurðarnar í rýmingarleiðunum lata upp úteftir
  • um rýmingarleiðir eru fríar, ruddiligar og nøktandi upplýstar, inni sum úti
  • um hurðar kunnu læsast upp innanífrá uttan lykil ella amboð
  • um rýmingarhurðar, sum ikki verða nýttar dagliga, eru merktar ”NEYÐÚTGONGD”
  • um neyðútgongdir ella skiltir eru fjald av garðinum e.ø.
  • um bjargingarop eru í uppihaldsrúmum
  • um slanguskáp javnan verða kannað og roynd
  • um uppheingingarstøð til CO2- og pulvursløkkjarar eru merkt eftir ásetingunum
  • um CO2- og pulvursløkkjarar eru kannaðir eina ferð um árið og útskiftir 5. hvørt ár
  • um teknikrúm eru ruddulig/frí fyri óruddi
  • um byggiligar broytingar, ið gjørdar eru nýliga, eru sýnaðar av Arbeiðs- og brunaeftirlitinum
  • um brunavandaligar goymslur eru og um tær eru lógliga innrættaðar
  • um starvsfólk eru kunnað um reglur, staðseting og nýtslu av sløkkiútgerð
  • um brunaplanur er, ið sýnir rýmingarleiðir, bjargingarop og staðseting av sløkkiútgerð

 

Afturat teimum vanligu brunakrøvunum, ið eru nevnd omanfyri, eru serlig krøv galdandi fyri:

  • Gistingarhús (bygningar og gistingardeildir, ið rúma fleiri enn 10 sovi- ella seingjarplássum, og stovnar, har rørslutarnað kunnu koma).
  • Samkomuhús (bygningar og høli, har nógv fólk koma saman).

 

Um sýnið vísir, at viðurskifti eru, sum kunnu elva til serligan vanda við atliti at brunatrygd, kann Arbeiðs- og brunaeftirlitið forbjóða virkseminum ella geva forboð fyri, at bygningar ella partar av bygningi, hølum ella mannaverki verða nýtt, til brekið er rættað.  

Tá ið talan er um eitt lítið brek, ið hevur minni upp á seg, verða skrivlig boð givin um at rætta brekið innan eitt ávíst tíðarskeið.