Sersíða um arbeiðsumhvørvi og covid-19 (coronavirsu)

Føroyska arbeiðsumhvørvislóggávan hevur ikki ítøkiligar reglur um støður, har ein altjóða smittuvandi kann gerast ein trupulleiki fyri arbeiðsumhvørvi.

Lóggávan ásetur tó, at arbeiðsgevarar skulu fremja munadygg tiltøk fyri at verja starvsfólkini, tá arbeiðsgongdin ella viðurskiftini, har arbeiðið verður framt, kunnu hava við sær vanda fyri smittu.

Hetta er serliga viðkomandi á arbeiðsplássum, har starvsfólkini eru í samband við nógv fólk. Í sambandi við arbeiðsferðir eigur møguligi smittuvandin at umhugsast.

Somuleiðis hava starvsfólkini skyldu til at stuðla fyribyrgjandi tiltøkunum, sum arbeiðsgevarin setur í verk - millum annað við at kunna arbeiðsgevaran, um tey eru ella hava verið í samband við fólk í smittuvanda, ella um tey hava ferðast til serliga rakt økir í heiminum.

Arbeiðs- og brunaeftirlitið hevur tískil framleitt nakrar serligar vegleiðingar, ið snúgva seg um arbeiðspláss og covid-19 (corona).

Hesar eru: 

• Innanhýsis kunning til starvsfólk – tilmæli um hvussu arbeiðsplássa eiga at skipa fyri kunning.
• Skipan av arbeiðinum – tilmæli um hvussu arbeiðspláss eiga at skipa seg.
• Kaffisteðgir, kantinur og annað – tilmæli um hvussu arbeiðspláss eiga at skipa kaffisteðgir, kantinur og annað.
• Reinføri og arbeiðsplássi – hvussu eigur reinføri at skipast.
• Handlar og smittufyribirging
  
• Frávika kunnu gerast frá ásetingunum um hvílitíð
• Fyribyrg coronasmittu á byggiplássum

Føroya Landsstýri hevur gjørt eina sersíðu við kunning, vegleiðing og tilmæli um covid-19 (coronavirus), ið Arbeiðs- og brunaeftirlitið mælir til at at arbeiðspláss og einstaklingar vitja. Sí: www.corona.fo