Roykfrí umhvørvi

Verandi løgtingslóg um tiltøk at minka um royking er frá 2008. Endamálið við hesi lóg er:

  • at tryggja øllum roykfrí umhvørvi,
  • at tryggja, at innandura støð og flutningsfør, har almenningurin hevur atgongd, eru roykfrí og
  • at avmarka marknaðarføring og sølu av tubbaki.

 

Roykiavmarkingar

Sambært lógini er royking er ikki loyvd innandura:

  • Á almennum arbeiðsplássum.
  • Á privatum arbeiðsplássum, har fleiri enn eitt fólk starvast.
  • Á stovnum, sum veita dag- ella samdøgurstilboð til børn, ung og vaksin.
  • Í skúlum, á sjúkrahúsum og í varðhaldinum.
  • Á støðum, har almenningurin hevur atgongd.
  • Í flutningsførum, har almenningurin hevur atgongd.
  • Tann, sum eigur, rekur ella ræður yvir stovnum, støðum og flutningsførum skal tryggja, at reglurnar um royking verða fylgdar.

 

Innflutningur, søla og lýsing av tubbaksvørum

Loyvt er ikki at lýsa við tubbaksvørum í bløðum, tíðarritum, bókum, kringvarpi, biografum, á alnetinum, skeltum, spjøldrum, faldarum o.ø.

Tubbaksvørur mugu ikki vera lutur í lýsingum fyri øðrum vørum ella tænastum.

Undantiknar forboðnum eru lýsingar í prentaðum dagbløðum og øðrum ritum, innflutt til Føroya, sum ikki eru skrivað ella prentað í Føroyum, uttan so at endamálið við tíðarritinum er at lýsa við tubbaksvørum í Føroyum.

Undantikin er tubbaksvøra, tá hon verður brúkt í ítøkiligum upplýsingar- og ávaringartiltøkum móti royking.

Loyvt er ikki at lýsa við ella á annan hátt at gera vart við ella kunna um, at ávísar tubbaksvørur eru minni skaðiligar enn aðrar.

Á sølustøðum, har tubbaksvøra verður seld, skal tubbaksvøran vera fjald soleiðis, at hon als ikki er sjónlig fyri viðskiftafólki.

Tað er bert loyvt at flyta inn tubbaksvørur til Føroyar til vinnuligt endamál og selja slíkar vørur, um tær eru merktar við ávaringarteksti samsvarandi reglum, ið landsstýrismaðurin hevur ásett, um heilsuvandar, ið standast av tubbaksnýtslu og innihaldslýsing av tjøruevni, nikotini, kolsúrevni v.m. –

Sí annars kunngerð nr. 105 frá 9. desember 2008 um krøv til innandura roykirúm og ávaringartekst um heilsuvandar v.m.

 

Aldursmark

Tað er ikki loyvt at selja ella lata tubbaksvørur til persónar yngri enn 18 ár. Er ivi um aldurin á keyparanum, kann søla bert fara fram, um keyparin skjalprógvar aldur sín.