Kynsligur ágangur í heilsu- og røktarstørvum
Kynsligur ágangur í heilsu- og røktarstørvum er ágangur, ið starvsfólk, sum starvast innan hetta økið, uppliva ella eru í vanda fyri at uppliva. Hetta slagið av ágangi verður framt av einum borgara, ið starvsfólkið hevur sum arbeiði at taka sær av.
Kynsligur ágangur í heilsu- og røktarstørvum er eitt viðkvæmt evni, tí at tey, ið fremja ágangin eru borgarar, ið búgva á ellis- ella røktarheimi, í sambýli, eru innløgd á sjúkrahús í styttri ella longri tíðarskeið ella búgva heima og fáa heimarøkt. Hesir borgararnir eru í eini serstakari støðu orsakað av niðursettum førleikum av onkrum slagi og hava stóran tørv á hjálp ella stuðli frá heilsu- og røktarstarvsfólki.
Ágangurin kann vera víðfevnandi og kann vera tilætlaður ella ótilætlaður. Ágangurin kann innibera t.d., at borgarin ger ósømiligar viðmerkingar, roynir eftir starvsfólkinum, óhóskandi nemur við ella tekur í starvsfólkið, gongur nakin, fremur kynsliga sjálvsnøktan frammanfyri starvsfólkinum, ella hevur annan atburð, ið fer út um mark hjá starvsfólkinum.