Søga

 

Arbeiðseftirlitið

Arbeiðseftirlitið í Føroyum hevur sín uppruna í gamla ‘Fabrikstilsynet’ og ‘Dampkedeltilsynet’ frá 1870 árunum.  

Arbeiðsmarknaðarmál vóru millum fyrstu føroysku málsøkini, sum vóru yvirtikin aftaná at heimastýrislógin kom í gildi í 1948.

Arbeiðseftirlitið, varð sett á stovn við løgtingslóg nr. 58 frá 24. mai 1974 um arbeiðaravernd, og fór at virka frá 1975. Arbeiðseftirlitið avloysti tá gamla ‘Maskineftirlitið‘, og varð fyrstu árini partur av teknisku fyrisitingini hjá Landsstýrinum.

Myndugleikin bleiv sjálvstøðugur almennur stovnur í fyrru helvt av 1980’unum, við Eli Davidsen sum stjóra.  

Í seinnu helvt av 1980 árunum vaks játtanin hjá Arbeiðseftirlitinum, og stovnurin bleiv deildur sundur í deildir kring landið. Stórar sparingar vóru tó framdar fyrst í 1990 árunum, sum høvdu við sær at deildirnar kring landið stongdu, og at stovnurin bleiv savnaður í Tórshavn.  

Við nýggja bygnaðinum í landsfyrisitingini síðst í 1990 árunum, gjørdist Arbeiðseftirlitið partur av málsræðinum hjá nýggja Vinnumálaráðnum.  

Í 2000 avloysti nýggja arbeiðsumhvørvislógin gomlu arbeiðaraverndarlógina frá 1974. Nýggja lógin breiðkaði virkisøkið hjá stovninum munandi.

Í 2011 bleiv Arbeiðseftirlitið, vegna sparingar, niðurlagt sum sjálvstøðugur stovnur og lagt til Heislufrøðiligu starvstovuni at umsita.

 

Brunaeftirlitið

Brunaumsjón Landsins var sett á stovn í 1986, við heimild í løgtingslóg nr. 78 frá 12. juni 1986 um eldsbruna o.a. Fyrstu nógvu árini var myndugleikin skipaður sum ein deild hjá Landsverkfrøðingastovninum, men varð seinri egin stovnur, við Petur á Lava Olsen sum stjóra.

Aftaná fleir umskipanir á tilbúgvingarøkinum gjørdist stovnurin deild hjá VØRN, við heitinum ‘Brunaeftirlitið’.

 

Arbeiðs- og brunaeftirlitið

Í 2017 vórðu Arbeiðseftirlitið og Brunaeftirlitið skipað í ein sjálvstøðugan stovn við heitinum Arbeiðs- og brunaeftirlitið. Stovnurin er partur av málsøkinum hjá Samferðslumálaráðnum.