Tann 20. desember 2017 sendi Samferðslumálaráðið 4 nýggj kunngerðaruppskot til hoyringar. Øll uppskotini hava heimild í løgtingslóg nr. 70 frá 11. mai 2000 um arbeiðsumhvørvi.

Talan er um fylgjandi uppskot:

• Uppskot til kunngerð um innrætting og nýtslu av trýstberandi útbúnaði: Uppskotið savnar allar reglurnar um trýstberandi útbúnað í einari dagførdari kunngerð. Við galdandi kunngerðum er hetta býtt yvir 4-5 ymiskar kunngerðir, harav tann elsta er frá 1950.

• Uppskot til kunngerð um uppseting og nýtslu av elevatorum o.ø.: Uppskotið er ein dagføring og nágreinan av galdandi reglum, og stuðlar m.a. undir ásetingarnar í nýggju byggireglugerðini fyri Føroyar.

• Uppskot til kunngerð um løggilding av serkønum veitarum mótvegis Arbeiðs- og brunaeftirlitinum: Uppskotið savnar og dagførir flestu løgildingarheimildirnar  hjá Arbeiðs- og brunaeftirlitinum, í einari dagførdari kunngerð. Hetta tryggjar, at øll løggildi virkir koma at virka undir somu krøvum og treytum.

• Uppskot til kunngerð um gjøld fyri løggildingar, ávís eftirlit og loyvisbrøv frá Arbeiðs- og brunaeftirlitinum.: Uppskotið kemur ístaðin fyri tvær eldri kunngerðir um gjøld, soleiðis at heimildirnar nú blíva savnaðar í einari kunngerð. Í hesum sambandinum eru gjøld fyri uppgávur, sum Arbeiðs- og brunaeftirlitið ikki longur ger, strikaði, meðan onnur gjøld og orðingar eru dagførdar.

Samferðslumálaráðið hevur sett hoyringsfreistina til 26. januar 2018. Uppskotini kunnu síggjast á heimasíðuni hjá Føroya Landsstýri: http://www.foroyalandsstyri.fo/kunning/uppskot-til-ummaelis/