Munagóð eftirlit betra um arbeiðsumhvørvið í byggivinnuni
Síðan 2015 hevur Arbeiðs- og brunaeftirlitið gjørt málrættaðar eftirlitsvitjanir í byggivinnuni, har serligur dentur m.a. er lagdur á eftirlit við byggipallum, tøkniligum hjálpartólum og vandanum fyri at detta niður í sambandi við arbeiði í hæddum. Staðfestir Arbeiðs- og brunaeftirlitið manglar í mun til arbeiðsumhvørvi, verða boð givin um at fáa manglarnar í rættlag.
Málið hjá myndugleikanum er, at øll byggipláss skulu vitjast minst eina ferð.
Hagtølini vísa ein greiðan samanhang millum málrættaðu eftirlitsvitjanirnar og batar í arbeiðsumhvørvinum:
- Í 2015 vóru 93 eftirlit gjørd og 479 boð givin.
- Í 2016 vóru 115 eftirlit gjørd og 261 boð givin.
- Í 2017 vóru 93 eftirlit gjørd og 127 boð givin.
Lítil ivi er tískil um, at eftirlitini seinru árini hava eina jaliga ávirkan á arbeiðsumhvørvið í føroysku byggivinnuni - og at støðið áhaldandi batnar.